Udaleku Irekiak 2017. Apuntatzeko epea zabalik apirilaren 12ra arte // Colonias Abiertas 2017. Plazo de inscripción abierto hasta el 12 de abril

La Mancomunidad abre el plazo de inscripción para los "Udaleku irekiak" que se desarrollarán del 26 de junio al 10 de julio. El plazo de inscripción estará abierto del 30 de marzo al 12 de abril. La matrícula puede realizarse online

Beste urte batez, Enkarterriko Mankomunitateko Euskara Zerbitzuak Udaleku Irekiak antolatu ditu, ume euskaldun edota eredu euskaldun batean ikasten dutenen artean euskararen erabilera sustatzeko asmoz.

Euskararen erabilera aisian urte osoan lantzen saiatzen gara Mankomunitateko Euskara Zerbitzuan, baina, udan hartzen du protagonismo handiena. Izan ere, ikasturtea amaituta, haur eta gazteek aisialdiaz gozatzeko tarte handiagoa izaten dute, baina, aukera gutxiago euskara entzuteko eta erabiltzeko, etxean gehienek senide euskaldunik ez baitute. Horregatik, gurasoei jakinarazi nahi diegu oso garrantzitsua dela uda garaian haurrei euskaraz aritzeko aukerak eskaintzea. Hutsune hori betetzeko, azken urteetan bezala Udaleku Irekiak izango ditugu.

Ekintzak ekainaren 26tik uztailaren 10era egingo dira, goizez, 10:00etatik 14:00etara. 350 pertsonentzako lekua egongo da, gehienez. Beti bezala, ume gehiagok izena ematen badute plazak zozketa baten bitartez esleituko dira apirilaren 27an. Parte-hartzaileek hainbat baldintza bete beharko dituzte:

-2005-2010 urte bitartean jaioak izan.

-Mankomunitatea osatzen duten udalerriren batean erroldatuta egon edota bertoko ikastetxe batean ikasi. Beti ere, bertan erroldatuek lehentasuna izango dute.

-Euskarazko ereduetan ikasi (B/D).

Aurreko urteetan bezala, lau gune osatuko ditugu: Zalla, Sodupe, Sopuerta eta Karrantza. Lau gune horietan Mankomunitatean dauden 9 udalerrietako umeek parte hartu ahal izango dute. Beste udalerrietako umeak eraman eta ekartzeko autobusak jarriko dira.

Oso eskaintza erakargarria eta zabala daukagu aurten ere, eta umeek askotariko ekintzak egiteko aukera izango dute, eta haietariko asko kanpoan egitekoak: esperimentazio-tailerrak, kirol eta trebetasun ginkanak, irteerak (Hondartzara eta Inguruabentura Entzia mendizerrara), zaldiz ibiltzea, gurpilaren eguna, igeritokia eta ur jolasak,eskulanak, gau bateko irteera aterpetxe batera, azken eguneko jaia… Dena den, lehentasuna euskara bultzatzea da eta horretarako udalekuen zehar euskararen erabilera bultzatzeko beren beregi prestatutako ekintza orokorrak egingo dira.

Izena emateko epea martxoaren 30ean hasi eta apirilaren 12an bukatuko da. Iaz ez bezala, matrikula banaka egin beharko da. Neba-arrebak badira, ume bakoitzeko eskaera-orri bana bete, baina, unitatetzat hartuko dira zozketa egin behar izatekotan.

Propaganda eta izena emateko orria eskoletan banatu da eta Kultur Etxe edo liburutegietan izango dute eskuragai, baita Zallako Gazte Zentroan ere. Aurten, ordainketa maiatzaren 2tik 11ra bitartean egin beharko da. Azken urteotan bezala, matrikula on-line egiteko aukera izango dute udalekuetarako prestatutako web orrian bertan: http://www.aldaketasoziala.com/inskripzioa . Beti bezala, web orri bat osatuko da udalekuei buruzko informazioa eta udalekuak egiten diren bitartean ateratzen diren argazkiak eta jarduerei buruzko komentarioak eskegitzeko: http://www.aldaketasoziala.com/enkarterri . Beraz, informazio gehiago nahi izatekotan web orri horretara edota www.enkarterri.eus webera jo beharko dute.